প্ৰসংগ : স্বগোষ্ঠীয় ঐতিহ্য ৰক্ষা আৰু সংবৰ্দ্ধনত টাই আহোম জনগোষ্ঠীয় সংগঠন সমূহৰ দ্বায়িত্ব আৰু কৰণীয়

বৰ্তমান সময়ৰ ওপৰুক্ত বিষয় বস্তুৰ তাৎপৰ্য্য তথা গুৰুত্ব আমি সকলোৱে অনুভৱ কৰিছোঁ ৷ বহু সময়ত কিছুমান প্ৰশ্ন উথাপন হয় নৱ্য আধুনিকতাৰ এই যুগত তাই আহোম ভাষাটো অধ্যয়ন বা উদ্ধাৰৰ কিবা প্ৰয়োজন আছেনে ? তাই ভাষাৰ কৃষ্টি সংস্কৃতি উদ্ধাৰ কৰি আমি আকৌ অতীতলৈ ঘূৰি যোৱাৰ প্ৰয়োজন কিয়? অসমীয়া জাতীয় জীৱনলৈ বিস্তৰ অৱদান আগবঢ়োৱা এই জাতিটোৰ আকৌ তাই আহোম বুলি চিনাকি দিয়াৰ প্ৰয়োজন কিয়? ইত্যাদি ৷ এইখিনি প্ৰশ্ন অন্যলোকৰ কথা বাদেই আমাৰ অনেকজন জ্ঞাতিয়ে প্ৰশ্ন তোলে ৷ আৰু এনে ভাৱৰ বশৱৰ্তী হৈ অনেকজন জ্ঞাতিয়ে তাই আহোম সংগঠন সমূহৰ প্ৰতি অনিহা প্ৰকাশ কৰে - সহযোগ কৰাৰ পৰা বিৰত থাকে ৷
এইখিনিতে ড° লীলা গগৈ দেউৰ " বেলি মাৰ গ'ল " গ্ৰন্থত এটি বাণী আমি মনত পেলাব লাগিব ৷ হিন্দু ধৰ্মৰ বৈষ্ণৱ কেন্দ্ৰক অহিংসাই শক্তিহীন কৰিলে ৰজাঘৰক , বীৰ্যহীন কৰিলে প্ৰজাক আৰু হিন্দু ধৰ্মৰ নামত ছিন্ন ভিন্ন হ'ল জাটিটো ৷" (পৃ:৮১) নিজৰ ভাষা, কৃষ্টি-সংস্কৃতি, পৰম্পৰা, ঐতিহ্য, স্বকীয় বৈশিষ্ট্য সমূহ হ'ল একোটা জাতিৰ মূল চালিকা শক্তি ৷ এইবিলাক নহ'লেই যিদৰে এটা জাতিৰ মৃত্যু অৱশ্যম্ভাৱী, সেইয়ে তাই আহোম জাতিটোৰ ভাষা, কৃষ্টি - সংস্কৃতি, পৰম্পৰা, স্বকীয়তাক পুনৰ সঞ্জীৱিত কৰাৰ প্ৰয়োজন হৈছে জাতিটোৰ অস্তিত্ব ৰক্ষাৰ বাবে ৷ 
আমি সকলোৱে গৌৰৱবোধ কৰোঁ আমাৰ ছশবছৰীয়া ইতিহাসক লৈ ৷ কিন্তু বিট্ৰিছ আমোলত সৃষ্টি হোৱা অসমীয়া বৌদ্ধিক কিছুমান লেখকে কেনেদৰে আমাৰ বুৰঞ্জী সমূহক বিকৃত কৰি অৱমূল্যায়নৰ চেষ্টা চলালে তাক আমি অধ্যয়ন কৰি চাব নোখোজো ৷ বৌদ্ধিকভাবে আহোমৰ অস্তিত্বক হেয় প্ৰতিপন্ন কৰিবৰ বাবে বুৰঞ্জীৰ বিকৃতকৰণত এই বুদ্ধিজীৱি সকলে হাত উজান দি তাই আহোমৰ প্ৰথমজনা চাওফা চাওলুং ছ্যু কা ফাক অসমীয়া জাতিৰ পিতৃ পুৰুষ বুলি জ্ঞান কৰা হয় সেই নমস্য প্ৰবাদ পুৰুষ গৰাকীৰে বংশ পৰিচয় বিকৃত কৰি জাৰজ, অনন্তৰ ম্লেজ হিচাপে কল্প কাহিনী সন্নিৱিষ্ট কৰি বুৰঞ্জীৰ বিভ্ৰাট ঘটোৱাৰ লগতে এক আদৰ্শ চৰিত্ৰৰ অৱমূল্যায়ন কৰি অপমান কৰিবলৈ ধৰিছিল ৷ চাওলুং ছ্যুকাফা তাই বংশীয় তেজ মঙহৰ বাস্তৱ চৰিত্ৰৰ লোক ৷ অন্যহাতেদি বুৰঞ্জী সত্যৰ ওপৰত প্ৰতিষ্ঠিত ৷ তাৰ বাখ্যা কল্পকাহিনীৰ সৈতে কেতিয়াও জড়িত হব নোৱাৰে ৷ " হিন্দু "হিন্দুমতে" বুলি কৈ চাওলুং ছ্যুকাফাৰ জন্মক বিকৃত কৰি দাঙি ধৰি তিনিটা কল্পকাহিনী সৰ্ম্পকে ড° সূৰ্য্য কুমাৰ ভূঞাই এনেদৰে আগবঢ়াইছে : " In the three accounts interred is our books we get on idea of the attempt made by Hindu Pundits to connect Ahom rulers with the classical Hindu Tradition. The old relationship with Indra has been foisted in these shories upon the circbmlances connected with the birth of the founder of the Ahom dynasty commonly wnown as the swarganarayane " ( Dr. Surjya Kumar Bhuyan)
দ্বিতীয় কাহিনী টোৰ সৰ্ম্পকে ভূঞাদেৱে কৈছে "the attempt to foist Hindu association with the birth of the progenitar of the Ahom kings glaringly visible in the account. The Ahom names of person and places are retained and the interotion of Indra leading to the birth of a son from his loins has been described in a regalar Brahminual fashion " Dr.SK Bhugan , Editor, Deodhai Ahom Buranji,(pg-33) .
এনে কাহিনী হৰকান্ত সদৰামীনৰ বুৰঞ্জীটো সন্নিবিষ্ট হৈছে ৷ ইয়াৰ ওপৰিও হলিৰাম ফুকন ডাঙৰীয়াই বঙলাভাষাত আসাম বুৰঞ্জী প্ৰণয়ণ কৰি তৰল উক্তি কৰি লিখিছিল "আসামেৰ অন্ত্যজ লোকে পঢ়া শুনা জানে৷ বিশেষত আহোম জাতিৰা অতি মূৰ্খ ৷ প্ৰদেশে যতই ভাগ্যৱান হয়, ততই অধিক মুৰ্খ হয় ৷ " এইদৰে আহোমৰ ওপৰত বৌদ্ধিক শোষণ আৰম্ভ কৰি আহোমত্ব ধ্বংসৰ ষড়যন্ত্ৰকাৰী সকলক আমাৰ চিনাক্ত কৰিবৰ হ'ল ৷ এটা জাতিৰ পিতৃ পুৰুষ গৰাকীৰ এই বিকৃতকৰণ কিমান অনৈতিক কাৰ্য্য আমি ভাৱি চাবৰ হ'ল ৷
স্বগোষ্ঠীয় ঐতিহ্যৰ ৰক্ষা আৰু সংবৰ্দ্ধনৰ বাবে বৰ্তমানৰ তাই আহোম সংগঠন সমূহে উমৈহতীয়া ভাৱে নিজৰ ভাষা সংস্কৃতিৰ জ্ঞান অৰ্জন কৰিবই লাগিব ৷ বৌদ্ধিক ভাৱে পুৰণি তাই আহোম ভাষাৰে পুথি সমূহ অধ্যয়ন কৰিবলৈ সক্ষম হ'লেহে আমি নিজস্ব শক্তিৰে ষড়যন্ত্ৰ কাৰী সকলক সমুচিত উত্তৰ দিব পাৰিম ৷ সাময়িক প্ৰেক্ষাপটত তাই আহোমৰ নামত সংগঠনৰ অভাৱ নাই ৷ কিন্তু এই সংগঠন সমূহৰ অধিকাংশ নেতৃত্বই জাতিৰ নামত কেৱল আজৰি সময়ৰ কামৰ দৰেহে বিবেচনা কৰে যেন আমাৰ অনুভৱ হয় ৷ আহোম জাগৰণৰ এই আন্দোলনত সূৰ্দীঘ ত্ৰিশটা বছৰত প্ৰতিজন নেতৃত্বই নিতৌ এঘন্টাকৈ দিয়া হ'লেও জাতিটোৰ অৱস্হা জয়জয় ময়ময় হ'লহেতেন ৷ কিন্তু পৰিতাপৰ বিষয় একো বিশেষ উন্নতি আমাৰ নহ'ল ৷ দিনেদিনে জনগোষ্ঠীয় পৰম্পৰাৰ পৰিৰ্ৱতে এই ৰাজধানী চহৰ খনত ধৰ্মৰ বিজতৰীয়া স্বৰূপবোৰহে আমাক গ্ৰাস কৰিবলৈ আৰম্ভ কৰিছে ৷
বৰ্তমান অসমৰ জনগোষ্ঠী সকলৰ ভিতৰত বড়োসকলৰ সংগঠন সমূহে স্ব-জাতিৰ ভাষা সংস্কৃতিৰ বিকাশৰ ক্ষেত্ৰত যিদৰে উল্লেখনীয় ভূমিকা পালন কৰিছে কিন্তু আমি তাই আহোমৰ সংগঠন সমূহে দহ শতাংশও কৰিব পৰা নাই ৷ শেহতীয়া ভাৱে তাই সাহিত্য সভাই ইয়াৰ চুড়ান্ত নিদৰ্শন দাঙি ধৰি জনমানসত আহোমক ধ্বংসৰ মুখলৈ দি জাতিটোকো জনমানসত হেয় প্ৰতিপন্ন কৰি তুলিছে ৷ তাই সাহিত্য সভাৰ বাৰ্ষিক অধিৱেশনত প্ৰতিনিধি সভাখনৰ লগতে বহুকেইটা বিশেষ গুৰুত্বপুৰ্ণ কাৰ্যসূচী অনুষ্ঠিত কৰিব নোৱাৰাটোৱে প্ৰমাণ কৰি দেখুৱাই দিলে যে জাতিটোক ৰক্ষা কৰাৰ ক্ষেত্ৰত বৰ্তমান বিষয়ববীয়াৰ সকলৰ তিলমানো সদিচ্ছা নাই ৷ কেৱল পদবী আৰু ক্ষমতাৰ খকৰ বাবেই এই সকলে সাহিত্য সভাত পদ দখল কৰি আছে ৷
তাই আহোমক ৰক্ষা কৰাৰ ক্ষেত্ৰত নৱপ্ৰজন্মৰ প্ৰতিনিধি সকলেই গুৰুত্বপূৰ্ণ ভূমিকা পালন কৰিব ৷ স্ব-ধৰ্ম আৰু পৰম্পৰা অনুসৰণ কৰি নিজৰ ভাষা সংস্কৃতিৰ বিকাশত মনোনিৱেশ কৰিলে হে জাতিটো বাচিব বুলি আশা কৰিব পাৰি ৷ " মে দাম মে ফি '' ৰ গুৰুত্বক উপলব্ধি কৰি আমি যদি সচাঁকৈয়ে আমাৰ পুলিন পচাও সকললৈ তৰ্পন আগবঢ়াইছো তেন্তে পুলিন পচাও সকলে শান্তিত থাকিব পৰাকৈ আমি নিজৰ পৰম্পৰাক সন্মান জনাবলৈ শিকিব লাগিব ৷ আজিৰ যুগত আহোমক নিন্দা কৰা মানুহৰ অভাৱ নাই কিন্তু নিজক আহোম হিচাপে প্ৰতিষ্ঠা কৰি লব পাৰিলেহে আমি সেইসকলক যুগ্য প্ৰত্যুত্তৰ দিবলৈ সক্ষম হব পাৰিম ৷
"পে' অঙ লে ম্যুঙ ডুন চুন খাম "
"পে' অঙ লে ফান তাই"