৭৮৮ তম ওম-ফা উদযাপন তথা এক অনুভৱ ✍ চাও সঞ্জীৱ বৰুৱা, শিৱসাগৰ

ওম-ফা আহোম যুগৰ ঐক্য-সংহতিৰ মহাদৰ্শৰ পূজা ৷ ওম-ফা কেৱল তাঈ আহোমসকলেই পূজা নহয় ৷ এই পূজা আহোম ৰাজত্বকালত ইয়াৰ থলুৱা সকলো জাতি-জনগোষ্ঠী সমূহৰ ভিন, ভিন বিশ্বাসৰ পূজা ৷ ঐতিহ্যপূৰ্ণ এটা জাতিৰ প্ৰতিনিধি হিচাপে চাও লুঙ ছ্যু কা ফাই তাঈ আহোমৰ নীতি পৰম্পৰাৰ আৰ্দশত থাকিও এখন সুস্থ সমাজৰ সৃষ্টিৰ উদেশ্য আগত ৰাখি মানুহক মানুহ হিচাপে গণ্য কৰি সম্প্ৰীতিৰ খুঁটিটোক মজবুত কৰাৰ স্বাৰ্থত ওম-ফাৰ আয়োজন কৰিছিল ৷ এই নীতি আৰ্দশক সাৰোগত কৰি পৰম্পৰাগত হিচাপে পুলিন-পুথাও সকলৰ প্ৰতি সন্মান জনাই প্ৰতি বাৰবছৰৰ মূৰে ওম-ফা অনুষ্ঠিত কৰি আহিছে ৷ ওম-ফা বুলি প্ৰকৃততে কোনো অনুষ্ঠান নাছিল, ছাই-ফা বুলিহে আছিল আৰু আজিও আছে ৷
৭৮৮ তম ওম-ফাত উপস্থিত হৈ পুলিন-পচাও সকললৈ শ্ৰদ্ধা জ্ঞাপন কৰাৰ সুযোগ প্ৰদান কৰা বাবে আয়োজক সকললৈ ধন্যবাদ জ্ঞাপন কৰিলো ৷ বিভিন্ন অনুষ্ঠানৰ আয়োজনৰ লগত জড়িত হৈ অনুভৱ কৰোঁ প্ৰকৃততে আয়োজক সমিতি যিমান বিশালকৈ গঠন হ'লেও মুষ্টিমেয় দুজনমানেহে কামবোৰ আগবঢ়াই থাকে যাৰ ফলত বিভিন্ন আহুকালৰ সৃষ্টি হয় ৷ যিকি নহওক অসমৰ বিভিন্ন ঠাইৰ আহোম জ্ঞাতি সকলক লগ পোৱাৰ যি সৌভাগ্য হ'ল সেইয়া বৰ্ণনাতীত ৷
কিছুমান কথা নকৈ নোৱাৰোঁ, আমাৰ আহোম সকলক শংকৰৰ বজৰুৱা ধৰ্মই ইমান মুৰত সোমাল গৈ যে নিজৰ বাৰ বছৰীয়া প্ৰৱিত্ৰ অনুষ্ঠানটোৰ গুৰুত্ব নিদিয়া হ'ল ফলত অৰ্থৰ অভাৱত ওম-ফাৰ ভালে কেইটামান কাৰ্যসূচীত বিলম্ব ঘটিল ৷ তাতোকৈ মনকৰিবলগীয়া আহোমৰ যিসকল আৰ্থিকভাৱে স্বচ্চল সেইসকলে আহোমৰ অনুষ্ঠান সমূহলৈ সামান্য এটা বৰঙণি আগবঢ়াবলৈ টান পাই অথচ সেইসকলেই গৌৰৱ কৰে আমি আহোম ৷ জাতিটোৰ পৰম্পৰা, কৃষ্টি আদি ৰক্ষা কৰিবলৈ হ'লে ছশবছৰীয়া জাতিৰ প্ৰতিনিধি হিচাপে কেৱল চিঞৰিলেই নহ'ব, সকলোৱে হাতে কামে কৰিব লাগিব ৷
ওম-ফা অনুষ্ঠানত উপস্থিত হৈ উপলব্ধি কৰিছোঁ যে আমাৰ আহোমৰ ধৰ্মীয় দিশটোৰ প্ৰচাৰৰ ক্ষেত্ৰত ই এক সুন্দৰ মাধ্যম হ'ব পাৰে ৷ এই বৰ্ষৰ ওম-ফাত অসমৰ বিভিন্ন প্ৰান্তৰ আমাৰ জ্ঞাতি সকল এদিনৰ বাবে হ'লেও এখন মঞ্চত লগ হৈছিল ৷ গতিকে ওম-ফাৰ আয়োজক সকলক অনুৰোধ জনাও যে ওমফা বাৰ বছৰৰ মুৰত কিয়, শংকৰ সংঘৰ অধিবেশনৰ দৰে প্ৰতি বছৰৰ অন্তৰে অন্তৰে জিলা ভিত্তিত আয়োজনৰ ব্যৱস্থা কৰক, তেতিয়াহে আমাৰ ধৰ্মীয় দিশটো উজ্বলি উঠিব বুলি আশা কৰিব পাৰিব ৷ নহ'লে অনাগত দিনত আহোমৰ প্ৰৱিত্ৰ ফুৰালুঙ ধৰ্মৰ প্ৰচাৰ বিমুখ হিচাপে থাকি থাকি আদৰ নাইকীয়া হৈ পৰিব৷ ওম-ফাৰ লগত সংগতি ৰাখি আমাৰ ধৰ্মীয়, সাংস্কৃতিক দিশৰো আলোচনা চক্ৰ আয়োজন কৰিব লাগে যাতে উঠি অহা নৱপ্ৰজন্মই নিজৰ বিজ্ঞান সন্মত ধৰ্মটোৰ বিষয়ে জানিব পাৰে ৷ গতিকে বৰ্তমানৰ আধুনিক যুগৰ লগত খাপখোৱাকৈ উপৰি পুৰুষৰ খেক্ লাই বা বিধিবোৰ ভৱিষ্যত প্ৰজন্মই গ্ৰহণ আৰু পালন কৰিব পৰাকৈ সংস্কাৰ কৰাতহে গুৰুত্ব প্ৰদান কৰাৰ প্ৰয়োজন আছে বুলি ভাৱো ৷