তাই আহোমৰ স্থাপত্য- ভাস্কৰ্যক বিশ্বমুখী কৰি তোলাত নিৰলস প্ৰচেষ্টা কৰা এজন শিল্পী মান চাও ৰাজীৱ বুঢ়াগোহাঁইৰ বিষয়ে চমু অৱলোকন(চাও সঞ্জীৱ ফূ-কে)

আহোমৰ ছশবছৰীয়া ৰাজত্বকালত স্থাপত্য - ভাস্কৰ্য আৰু শিল্প- কলাৰ দ্ৰুত বিকাশ সম্ভৱ হৈছিল ৷ তাৰ প্ৰমাণ আজিও সৰ্গৱে জিলিকি আছে সোণালী যুগৰ ৰশ্মি ৷ আনকি দেশবিদেশৰ পৰিব্ৰাজকৰ লেখনি সমুহতো এই ভাস্কৰ্য সমুহৰ নিৰ্মাণ শৈলীয়ে স্থান লাভ কৰিছিল ৷
আধুনিক যুগত আহোমৰ এই গৌৰৱময় চানেকিসমুহে পুনৰ প্ৰাণ পাই উঠিছে এজন অখ্যাত শিল্পীৰ সুনিপুণ হাতৰ পৰশত ৷ শিৱসাগৰ জিলাৰ মেছাগড়ৰ বুঢ়াগোহাঁই গাঁৱৰ শিল্পী ৰাজীৱ বুঢ়াগোহাঁইয়ে এটুকুৰা মাত্ৰ কাঠেৰে সুন্দৰকৈ সাজি উলিয়াইছে ৰংঘৰ আৰু কাৰেং ঘৰ ৷ কোনো ধৰণৰ আনুষ্ঠানিক প্ৰশিক্ষণ নোলোৱাকৈ হাতুৰী , বটালী আৰু নিজৰ কল্পনাৰ সহায়ত ২৹৹৫ চনৰ পৰাই শিল্পচৰ্চাত জড়িত হৈ পৰে ৷ ইতিমধ্যে সৰুবৰ ৰংঘৰ, কাৰেংঘৰ, তলাতল ঘৰ, শিৱদ'ল, বৰটোপ, বৰব'গ, ম'ৰা চৰাই, গড়, জিৰাফ, ভাৰতবৰ্ষৰ মেপ, শৰাই, তাই আহোমৰ ধৰ্মীয় প্ৰতীক ড্ৰেগনৰ লগতে শিল্পীজনাৰ হাতত প্ৰাণ পাই উঠিছে ৭ খন মহাদেশ আৰু ৫ খন মহাসাগৰৰ সৈতে পৃথিৱীৰ এক অভিনৱ গোলক ৷ অসমৰ ঐতিহ্যপূৰ্ণ আৰু কীৰ্তি চিহ্নসমুহৰ ভাস্কৰ্য নিৰ্মাণৰ নিৰলস সাধনা অব্যাহত ৰখা শিল্পীজনে আৰম্ভ কৰিছে মহান ৰাষ্ট্ৰনায়ক চাও লুঙ চুকাফাৰ প্ৰতিমূৰ্ত্তি নিৰ্মাণৰ কাম ৷
কোনোধৰণৰ চৰকাৰী সাহায্য নোপোৱাকৈয়ে কেৱল নিজৰ দক্ষতাৰ বলত সৃষ্টি কৰা শিল্পীজনাৰ ভাস্কয্য সমুহে আন্তৰাষ্ট্ৰীয় প্ৰেক্ষাপটত ৰাছিয়া, ফ্ৰান্স আদিতো প্ৰশংসা লাভ কৰিবলৈ সক্ষম হৈছে ৷ তদুপৰি কেইবাখনো আন্তজাৰ্তিক কৰ্মশালাটো তেওঁৰ শিল্পকল্পা প্ৰদৰ্শিত হৈছে ৷
পৰিতাপৰ বিষয় এইযে স্থানীয় প্ৰচাৰ মাধ্যম সমুহ , সংবাদদাতা সকলে তেওঁৰ কৰ্মৰাজীৰ প্ৰচাৰৰ ক্ষেত্ৰত আওকণীয়া মনোভাৱ পোষণ কৰাহে পৰিলক্ষিত হয় ৷ শিল্পীজনৰ লগত কথা পাতি অনুভৱ কৰিছিলো কিমান কষ্টত তেওঁৰ নিজৰ প্ৰচেষ্টা অব্যাহত ৰাখিছে ৷ অনাগত দিনত আমাৰ প্ৰচেষ্টা হ'ব চুকে কোণে সোমাই থকা এই অখ্যাত প্ৰতিভাসমুহক সমাজৰ আগত তুলি ধৰা ৷
বিশেষ কৃতজ্ঞতা: চাও শশাংক সন্দিকৈ